د خوست سموات باغ صنعتي پارک پرانیستل شو
دوشنبه مورخ ۲۷ جمادی الاول ۱۴۴۵ / ۲۰ لیندی ۱۴۰۲
د صنعت او سوداګري وزارت مرستیال ښاغلي مولوي قدرت الله جمال د مل پلاوي سره خوست ولایت ته رسمي سفر ترسره کړ. د یاد سفر موخه په خوست ولایت کې د سموات باغ د صنعتي پارک پرانیسته وه چې د ځانګړي مراسمو په ترڅ کې ترسره شوه.
په دې مناسبت جوړې شوې غونډې ته د وینا په مهال ښاغلي جمال وویل: وخت رارسېدلی چې صنعتکاران او سوداګر خپله پانګه په خپل هیواد کې په کار واچوي.
نوموړي د یاد پارک پرانیستې ته په اشاره وویل چې ااا د صنعت او سوداګرۍ په ډګر کې د بېساري ګامونو په پورته کولو د هیواد د صنعت ودې ته خپلې قوي ارادې څرګندوي.
د خوست ولایت د سوداګرۍ رئیس مولوي شمس الاحد د خپلو خبرو په ترڅ کې د سوداګرۍ وزارت له مرستیال څخه مننه وکړه او د سموات باغ پارک پرانیسته یې د خوستي ولس لویه هیله وبلله.
د یادونې وړ ده چې یاد پارک ۴۰۰ جریبه ساحه لري او د ۱۷۹۳۰۰۰افغانیو په لګښت یې د احاطې دېوال او سرک جوړیږي چې په ۱۵ کاري ورځو کې به یې د جوړولو چارې بشپړې شي.
