د ریل پټلۍ له لارې د ایران او افغانستان تر مینځ انتقالات زیاتېږي
یکشنبه ۱۸ رجب المرجب ۱۴۴۶ / ۳۰ مرغومی ۱۴۰۳
د افغانستان د اسلامي امارت د صنعت او سوداګرۍ وزارت سرپرست محترم الحاج نورالدین عزیزي د ایران د ریل پټلۍ څخه د ګټې اخیستنې ادارې مرستیال محترم انجنیر مرتضی جعفري په مشرۍ د هغه هېواد له پلاوي سره وکتل.
پدې کتنه کې د ریل پټلۍ له لارې د دواړو هېوادو تر مینځ د صادراتو او وارداتو په تړاو او همدارنګه اروپایي هېوادونو ته د ریل پټلۍ په واسطه د ایران او ترکیې له لارې د افغاني توکیو د لېږد په اه خبرې وشوې.
د ایران د اسلامي جمهوریت پلاوي پدې لیدنه کې ژمنه وکړه چې افغانستان صادراتي، وارداتي او ترانزیتي توکي به په ټيټه بیه او دامکان په صورت کې په کمه موده کې لېږدوي.
محترم الحاج عزیزي د دواړو هېوادو د دولتونو له خوا سوداګرو ته د آسانتیاوو پر برابرولو او د ریل پټلۍ له لارې د لېږد رالېږد په زیاتوالي پر ټینګار سره یو پنځه کسیز پلاوی د همغږۍ لپاره ایراني پلاوي ته ور وپېژندلو.
