د هرات صنعتي ښارګوټي  داحاطوي دېوال رغونه

 سه شنبه دچنګاښ ۱۴مه  ۱۴۰۰

 د هرات د صنعتي ښارګوټي د دیوال ، امنیتي برجونو او دروازو د جوړولو د پروژې دبنسټ ډبره د صنعت او سوداګرۍ وزیر ښاغلي نثار احمد غوریاني ، د هرات د مرستیال والي نور احمد حیدري، د هرات د صنایعو او کانونو رییس حمیدالله خادم لخوا کیښودل شوه.

ښاغلي غوریاني د دې پروژې د پرانستې په مراسمو کې وویل چې پردې پروژه سربیره په دغه ولایت کې د پنځو صنعتي ښارګوټو شاوخوا د دیوال جوړولو کار هم پیل شوی دی.

نوموړي  زیاته کړه چې دغه پروژه چې د صنعتي ښارګوټي د امنیتي برجونو او دروازو تر څنګ یو دیوال هم لري په لومړي پړاو کې به په راتلونکو 9 میاشتو کې د شپږ کیلومترو په اوږدوالي جوړه شي.

په دغو مراسمو کې  د هرات مرستیال والي وویل چې هرات ولایت د هیواد د اقتصادي مرکز په توګه د ډیرو شرکتونو او تولیدي فابریکو د فعالولو ظرفیت لري ، او د دې دیوال او امنیتي برجونو جوړول کولی شي په دې ښارګوټي  کې امنیتي ستونزې حل کړي او لا ډیرو فابریکو جوړولو ته د پانګوالو پاملرنه راجلب کړي.

 له بلې خوا د هرات د صنایعو او کانونو رییس حمیدالله خادم د صنعتي ښارګوټي د دیوالونو ، برجونو او دروازو جوړول د ښارګوټي  د ښه امنیت او د ملکیت ساتنې په لاره کې ستر ګام بولي.

 د هرات صنعتي ښارګوټی په درې پړاوونو کې ، چې له 300 څخه ډیرې فابریکې لري ، د هیواد یو له اقتصادي مرکزونو څخه دی ، چې د صنعت او سوداګرۍ وزیر په وینا؛  څلورم پړاو به یې په راتلونکي کې د ۱۵۲ نويو فابریکو سره یوځای جوړ شي.