له خصوصی سکتور سره دافغانستان- پاکستان دسوداګرۍ او ترانزیټ په وړاندې دننګونو او فرصتونو غونډه جوړه شوه

یکشنبه: دلړم۲۵ مه ۱۳۹۹

له خصوصی سکتور سره دافغانستان پاکستان دسوداګرۍ او ترانزیټ په وړاندې دننګونو او فرصتونو غونډه دصنعت او سوداګرۍ وزارت دسرپرست وزیر ښاغلي نثار احمد غوریاني په مشرۍ او دافغانستان دسوداګرۍ خونو داستازوپه ګډون ترسره شوه.

ټاکل شوې ده چې په روانه اونۍ کې دپاکستان دسوداګرۍ وزیراوپه اقتصادي چارو کې دیاد هېواد دلومړي وزیر مشاورښاغلی رزاق داوود، دافغانستان، پاکستان تر منځ دسوداګرۍ او ترانزیټي ستونزو دحل په موخه کابل ته راشي.

په دغه غونډه کې په همدې موضوع بحث او خبرې اترې وشوې، ترڅودهېواد خصوصي سکتور خپلې ستونزې، فرصتونه او ننګونې په نښه او له پاکستاني لوري سره یې شریکې کړي.

دیادونې وړ ده چې دروانې میاشتې په لومړیو کې ښاغلي غوریاني دیوه لوړرتبه پلاوي په مشرۍ پاکستان هېواد ته سفروکړ او هلته یې دافغانستان، پاکستان دسوداګرۍ او پانګونې په کلنۍ ناسته کې ګډون وکړ، نوموړي په دغه سفر کې دپاکستان هېواد له لومړي وزیر ښاغلي عمران خان او دیاد هېواد دسوداګرۍ له وزیر سره دکتنو تر څنګ دافغان سوداګرو ۲۱مورده سوداګري،ترانزیټي او ګمرکي ستونزې حل کړې.