په کندهار ولایت کې د صادراتي محصولاتود اسنادو د پروسې پلي کولود مرکز پرانیسته
سهشنبه: دغبرګولي ۱۱مه ۱۴۰۰
په کندهار ولایت کې د هیواد صادراتي محصولاتو د پروسې پلي کولومرکز د صنعت او سوداګرۍ وزیرښاغلي نثار احمد غوریاني ، د کرنې ، مالدارۍ او اوبو لګولو وزارت د طبیعي سرچینو معین حشمت الله غفوري، د صادراتو په چارو کې د ولسمشر سلاکار جلال الدین سعید او او ددغه ولایت دوالي روح الله خانزاده لخوا پرانیستل او ګټې اخیستنې ته چمتو شو.
دصنعت او سوداګرۍ وزیرښاغلي نثار احمد غوریاني د دغه مرکز د پرانیستې په مراسمو کې د افغانستان د اسلامي جمهوریت د ولسمشرجلالتمآب ډاکټر محمد اشرف غني د دوامداره ملاتړ هرکلی وکړ او ویې ویل چې دا مرکز د لومړي ځل لپاره په کندهار ولایت کې رامنځته شوی دی.
ښاغلي غوریاني همدارنګه زیاته کړه چې د هیواد د محصولاتو د صادراتو د زیاتوالي په موخه به ، په نږدې راتلونکي کې د صادراتي محصولاتو د اسنادو ورکولو پروسې پرمهال د هیواد په مهمو اقتصادي او سوداګریزو زونونو کې واحد مرکزونه جوړ شي.
د صنعت او سوداګرۍ وزیر د هیواد د محصولاتو صادراتو زیاتوالي ته په اشارې سره وویل چې دغه وزارت د دولتي ادارو ، خصوصي سکتور او نړیوالو مرسته کونکو په همکارۍ هڅه کوي چې د کورنیو تولیداتو په ځانګړي ډول د هیواد کرنیزو محصولاتو لپاره نړیوال سندونه ترلاسه کړي.
ښاغلي غوریاني زیاته کړه چې د افغانستان صادراتي محصولاتو لپاره د نړیوالو سندونو په ترلاسه کولو سره به د هیواد صادرات سږکال دوه ملیاردو ډالرو ته لوړ شي.
د دې مرکز د پرانستې په مراسمو کې د کرنې ، اوبولګولو او مالدارۍ وزارت د طبیعي سرچینو معین هشمت الله غفوري وویل چې د کرنیزو محصولاتو تولید مخ په ډیریدو دی او په مهمو اقتصادي او سوداګریزو زونونو کې د ورته مرکزونو جوړول د کرهنیزو صادراتوپه زیاتوالي کې خورا اغیزمن تمامیږي.
په دغو مراسمو کې ، د کندهار والي ، د صادراتو په چارو کې د ولسمشر سلاکار او د خصوصي سکتور استازو د دې مرکز د جوړولو او د هیواد د محصولاتو د صادراتو له زیاتوالي څخه د ملاتړ په هکله خبرې وکړې او ټینګار یې وکړ چې د افغانستان د صادراتو زیاتوالی لپاره لازیاتې اسانتیاوې باید برابرې شي .
