خصوصي سکتور دحکومت تر ټولو مهم شریک بلل کیږي

یکشنبه : دزمري ۱۰مه ۱۴۰۰

د افغانستان ډیجیټل اونۍ په مناسبت د افغانستان د اسلامي جمهوریت د جمهوررئیس محمداشرف غني په مشرۍ د کابینې لومړۍ الکترونیکي غونډه جوړه شوه.

په دې غونډه کې جلالتمآب ولسمشر محمد اشرف غني  وویل چې خصوصي سکتور د حکومت یو مهم شریک دی او د دې سکتور د ستونزو حل د افغانستان د اسلامي جمهوریت د حکومت لومړیتوب دی او زیاته یې کړه چې که خصوصي سکتور نه وی نو  نن به د هېوادوالو ته د اړتیا وړ لومړنیو توکو نرخونه څو چنده لوړ شوي وای.

همداراز جلالتمآب ولسمشر د صنعت او سوداګرۍ او مالیې وزیرانو ته لارښوونه وکړه چې دواړه وزارتونه باید د خصوصي سکتور د ستونزو د حل لپاره په ګډه کار وکړي او د دوی د فعالیتونو د پراخولو لپاره لازمې اسانتیاوې برابرې کړي.

د صنعت او سوداګرۍ ، وزارت ، د بازار دمدیریت  او د هېوادوالولپاره د اړتیا وړ لومړنیو توکو د رسولو په موخه، د مالیې ، کرنې ، اقتصاد ، اوبو لګولو او مالدارۍ وزارتونو او خصوصي سکتورپه همکارۍ د لومړنیوتوکو ستراتیژیکو زیرمودچمتو کولو لپاره یو پلان چمتو او ترتیب کړی.

دیادونې وړ ده چې دا پلان په څو غونډو کې د مالیې ، کرنې ، اوبو لګولو او مالدارۍ ، اقتصاد ،وزارتو، د افغانستان د خونو فدراسیون استازو ، دخصوصي سکتور له بیلابیلو اطاقونواو د خصوصي سکتور داستازو په ګډون چمتو شوی وو ، چې په نږدې راتلونکي کې به دمنظورۍ اخیستو په موخه دولسمشرۍ ماڼۍ مقام ته وړاندې شي .