تبادل‌نظر پیرامون سفر هیئت عالی‌رتبه امارت اسلامی افغانستان به جمهوری قرغیزستان صورت گرفت
چهارشنبه، 5 صفرالمظفر 1447 / 8 اسد 1404
محترم الحاج نورالدین عزیزی، سرپرست وزارت صنعت و تجارت امارت اسلامی افغانستان با محترم آقای تورداکُن سیدیکوف، سفیر جمهوری قرغیزستان مقیم کابل دیدار و ملاقات نمود.
در این ملاقات دوطرف در رابطه به سفر هیئت عالی‌رتبه امارت اسلامی افغانستان جهت اشتراک در فوروم اقتصادی قرغیزستان، ملاقات دوجانبه با مقامات و مسئولین آن کشور و ملاقات با مقامات سایر کشورهای اشتراک‌کننده در این فوروم، ایجاد گروپ کاری مشترک، رشد تجارت، همکاری‌های بیشتر در مسیرهای ترانزیتی، استفاده از فرصت‌های اقتصادی و تجاری دوکشور و کشورهای منطقه، امضای موافقت‌نامه‌های تجارتی، ترانزیتی و سرمایه‌گذاری، امضای معاهده سه‌جانبه میان افغانستان، قرغیزستان و تاجیکستان، فعالیت‌های صورت گرفته در مورد امضای نقشه راه میان افغانستان و قرغیزستان بحث و تبادل‌نظر نمودند.
همچنین در این ملاقات سفیر جمهوری قرغیزستان مقیم کابل ضمن ارایه معلومات در مورد فوروم اقتصادی آن کشور، اظهار داشت که وزارت تجارت و اقتصاد آن کشور مشتاقانه خواهان کار با افغانستان می‌باشد.
