د صنعت او سوداګرۍ وزارت مرستیال د یو شمېر بهرنیو پانګوالو او صنعتکارانو سره وکتل

چهارشنبه ۲ذوالقعدة الحرام ۱۴۴۶ / ۱۰ ثور ۱۴۰۴

پرون، د سه شنبې په ورځ، د صنعت او سوداګرۍ وزارت معین محترم مولوي احمدالله زاهد او ورسره مل پلاوي په تاشکند ښار کې د اوزبیکستان هېواد له لوري په جوړه شوې نمایشګاه کې د یو شمېر بهرنیو پانګوالو او صنعتکارانو سره وکتل.

ښاغلي زاهد د نوموړو صنعتکارانو له تولیداتو څخه د نږدې کتنې ترڅنګ، هغوی د افغانستان په اقتصادي بازار کې د پانګونې لپاره وهڅول.

په دې غونډه کې بهرنیو پانګوالو د افغانستان د اقتصادي امکاناتو او فرصتونو په اړه خپله لیوالتیا څرګنده کړه او ژمنه یې وکړه چې په نږدې راتلونکي کې به د افغانستان په بېلابېلو برخو کې پانګونه وکړي.

ښاغلي زاهد د بهرنیو پانګوالو د همکارۍ د ارزښت په اړه خبرې وکړې او د افغانستان د اسلامي امارت هغه هڅې یې بیان کړې چې د اقتصادي پرمختګ او د صنعت د ودې لپاره یې ترسره کړي دي.