برگزاری اولین نشست آنلاین وزرای صنعت کشورهای عضو سازمان همکاری شانگهای

شنبه 26 سرطان 1400  

نخستین نشست آنلاین وزرای صنعت عضو سازمان همکاری شانگهای با حضور نثاراحمد غوریانی وزیر صنعت و تجارت، شیرعلی خان کبیر وزیر صنعت جمهوری تاجیکستان، وزرای صنعت دولت فدراتیف روسیه، جمهوری هند، جمهوری قزاقستان، جمهوری خلق چین، جمهوری قیرغیزستان، جمهوری پاکستان و جمهوری اوزبیکستان برگزار شد.

در این نشست آنلاین، روی چگونگی همکاری‌های مشترک در توسعه‌ی صنایع و سرمایه‌گذاری‌ها در سکتورهای مختلف میان کشورهای عضو سازمان همکاری شانگهای بحث و تبادل‌نظر صورت گرفت.

نثاراحمد غوریانی در این نشست گفت که در افغانستان فُرصت‌های خوبی سرمایه‌گذاری در سکتورهای مختلف به خصوص در بخش صنعت موجود است و از سرمایه‌گذاران کشورهای عضو سازمان همکاری شانگهای خواست که در افغانستان سرمایه‌گذاری نمایند.

آقای غوریانی افزود که وزارت صنعت و تجارت جمهوری اسلامی افغانستان سهولت‌های ویژه‌ای برای سرمایه‌گذاران خارجی در بخش‌های اخذجواز صنعتی – سرمایه‌گذاری ایجاد و فراهم کرده است.

وزیر صنعت و تجارت با اشاره به موقعیت جغرافیای سیاسی، اقتصادی و ترانزیتی کشور در منطقه گفت که افغانستان نقطه‌ی وصل کشورهای آسیای میانه و اورپا به آسیای جنوبی بوده و سرمایه‌گذاری در این کشور به خصوص در بخش زیرساخت‌های ترانزیتی به نفع توسعه‌ی اقتصاد کشورهای عضو این سازمان می‌باشد.

در این نشست شیرعلی خان کبیر وزیر صنعت و تکنالوژی نو جمهوری تاجیکستان گفت که افزایش سطح همکاری‌های اقتصادی به خصوص سرمایه‌گذاری مشترک در سکتورهای مختلف میان کشورهای عضو این سازمان به نفع اقتصاد و تجارت کشورهای منطقه می‌باشد.

سازمان همکاری شانگهای، سازمانی میان‌دولتی است که برای همکاری‌های چندجانبه‌ی امنیتی، اقتصادی و فرهنگی تشکیل شده و افغانستان عضو ناظر این سازمان می‌باشد.