دیدار وزیر صنعت و تجارت با وزرای انکشاف اقتصادی و تجارت, صنعت و تکنالوژی نو جمهوری تاجیکستان

سه‌شنبه ۱۰ حمل ۱۴۰۰

نثاراحمد غوریانی وزیر صنعت و تجارت که با جلالتماب محترم داکتر محمداشرف غنی رئیس جمهور کشور و هیأت همراه‌شان به هدف اشتراک در کنفرانس دوروزه‌ی قلب آسیا (پروسه‌ی استانبول) به جمهوری تاجیکستان سفر کرده است با محترم ذوقی ذوقی‌زاده امین وزیر انکشاف اقتصادی و تجارتی و محترم شیرعلی کبیر وزیر صنعت و تکنالوژی نو در شهر دوشنبه پایتخت آن کشور دیدار کرد.

در این دیدار روی توسعه‌ی همکاری‌های روابط تجارتی - ترانزیتی و اقتصادی میان دوکشور، تسهیل روابط تجارتی، رفع موانع صادراتی محصولات افغانستان به تاجیکستان و آغاز همکاری در عرصه‌ی سرمایه‌گذاری مشترک در سکتورهای مختلف میان افغانستان - تاجیکستان بحث و تبادل‌نظر کردند.

نثاراحمد غوریانی وزیر صنعت و تجارت جمهوری اسلامی افغانستان در این دیدار گفت که تاجران افغانستان در بخش اخذویزه‌ی تجارتی جمهوری تاجیکستان به مشکل مواجه بوده و ما خواهان رفع این مشکل از سوی وزارت انکشاف اقتصادی و تجارتی کشور دوست و برادر تاجیکستان می‌باشیم.

آقای غوریانی با تأکید به افزایش صادرات محصولات افغانستان به جمهوری تاجیکستان، خواهان همکاری در افزایش حجم تجارت میان دوکشور گردید.

آقای غوریانی همچنین از سرمایه‌گذاران تاجیکستانی خواست که در سکتورهای مختلف در افغانستان سرمایه‌گذاری کرده ویا سرمایه‌گذاری مشترک را با سرمایه‌گذاران افغانی آغاز نمایند.

وزرای انکشاف اقتصادی و تجارتی و صنعت و تکنالوژی نو جمهوری تاجیکستان در این دیدار نیز خواهان آغاز همکاری مشترک در عرصه‌های اقتصادی، تجارتی - ترانزیتی و صنعتی با جمهوری اسلامی افغانستان گردیده و وعده سپردند که مشکلات ویزای تاجران افغان به کشورشان را نیز حل می‌نمایند.

در ختم این دیدار طرفین فیصله کردند که تیم‌های تخنیکی وزارت خانه‌های صنعت و تجارت جمهوری اسلامی افغانستان و انکشاف اقتصادی و تجارتی و صنعت و تکنالوژی نو جمهوری تاجیکستان به هدف فراهم‌آوری تسهیلات و زمینه‌های لازم گسترش همکاری اقتصادی، تجارتی - ترانزیتی و صنعتی میان دوکشور، کار روی تدوین تفاهم‌نامه و توافق‌نامه‌های دوجانبه را آغاز نمایند.